Кондак, глас 1

Воскресл еси яко Бог из гроба во славе, / и мир совоскресил еси; / и естество человеческое яко Бога воспевает Тя, и смерть исчезе; / Адам же ликует, Владыко; / Ева ныне от уз избавляема радуется, зовущи: / Ты еси, Иже всем подая, Христе, воскресение.

Кондак, глас 2
Воскресл еси от гроба, Всесильне Спасе, / и ад, видев чудо, ужасеся, / и мертвии восташа; / тварь же видящи срадуется Тебе, / и Адам свеселится, / и мир, Спасе мой, воспевает Тя присно.

Кондак, глас 3

Воскресл еси днесь из гроба, Щедре, / и нас возвел еси от врат смертных; / днесь Адам ликует, и радуется Ева, / вкупе же и пророцы с патриархи воспевают непрестанно / Божественную державу власти Твоея.

Кондак, глас 4

Спас и Избавитель мой / из гроба, яко Бог, воскреси от уз земнородныя, / и врата адова сокруши, / и яко Владыка / воскресе тридневен.

Кондак, глас 5

Ко аду, Спасе мой, сошел еси, / и врата сокрушивый яко всесилен, / умерших яко Создатель совоскресил еси, / и смерти жало сокрушил еси, / и Адам от клятвы избавлен бысть, Человеколюбче; / темже вси зовем: / спаси нас, Господи.

Кондак, глас 6

Живоначальною дланию / умершия от мрачных удолий / Жизнодавец воскресив всех Христос Бог, / воскресение подаде человеческому роду: / есть бо всех Спаситель, / Воскресение и Живот, и Бог всех.

Кондак, глас 7

Не ктому держава смертная / возможет держати человеки: / Христос бо сниде, сокрушая и разоряя силы ея; / связуем бывает ад, / пророцы согласно радуются, / предста, глаголюще, Спас сущим в вере, / изыдите, вернии, в воскресение.

Кондак, глас 8

Воскрес из гроба, умершия воздвигл еси, / и Адама воскресил еси, / и Ева ликует во Твоем Воскресении, / и мирстии концы торжествуют / еже из мертвых востанием Твоим, Многомилостиве.